|| जिवेत् शरदः शतम् ||
आघाडीच्या गझलकार, विदुषी चंदना सोमाणी यांचा आज वाढदिवस! अभंग शुभेच्छा!
शब्दांनाही सूर भेटता ..... !
*******************
दुःख कधी केविलवाणे असू शकते का? तर याचे उत्तर बिनदिक्कतपणे, 'होय!' असे द्यायला हरकत नाही. फक्त अट एकच आहे यासाठी आघाडीची गझल लेखिका चंदना सोमाणी यांची एक गझल तुम्हांला ऐकावी लागेल. गझलगंधर्व सुधाकर कदम यांनी संगीतबद्ध केलेली आणि गायक, सुरेश वाडकरांच्या तलम आवाजातील ही गझल जरूर ऐका. नेमकी गझल कशी असते वा असायला पाहिजे हे इथे स्पष्टपणे जाणवते. शब्द असे आहेत ...
'शब्दांनाही सूर भेटता मिठीत हरखे गाणे
दुःख असे की हसून जाते मधून केविलवाणे'
दुःखाने लाजिरवाणे होऊन केविलवाणे हसावे असे वाटत असेल तर शब्दांना सूर तितक्याच ताकदीचे भेटायला हवेत! मग, एवढ्यावर भागत नाही तर, हेच शब्दसूर मिठीत हरखून जातात!
वादळवाटा दूरवर भेटायला येत असतील तर नवल नाही, त्यांच्या वाटांवर सोबतीला सुखदुःखाचे गीत सुद्धा असते, हे विशेष!
राधा sss राधा sss म्हणत शाम हरवत जातो. पाव्यामधून विरह गीत ऐकायला येत असेल तर अशी अवस्था ठरलेली!
रात्रभर सूर्य दिसेनासा होतो. कोण त्याला असे विझवित असेल असा बाळबोध प्रश्न उपस्थित होतो. कदाचित, काळोखाला भेटण्यासाठीची त्याची ही धडपड असावी. शब्द आणि विचार यांचेशी एकरूप झाले की लेखनाची गती वाढत जात असावी. सोबतीला व्यासंग आणि सातत्य असले की मनाला भुरळ घालणारी रचना कागदावर उमटतेच उमटते! चंदना सोमाणी सारख्या तयारीच्या गझलकाराच्या गझलेवर भाष्य करणे मग खूप अवघड होऊन बसते. नुसत्या दोन ओळींचा आशय, व्यापक परीघ खूप काही बोलून जातो, सांगून जातो. नवोदितांच्या लेखनासाठीची ही अशी प्रचंड ऊर्जा निश्चितच असते.
'धुके धुमसते जेव्हा जेव्हा मनात माझ्या
प्रभातकाळी शीळ घालतो पहाटवारा'
इथला पहाटवारा आकर्षित ही करतो व मन मोहून ही घेतो! परिचयाचे सोपे, साधे शब्द नटून थटून असे सामोरे येतात तेव्हा, तयारीच्या रचनाकाराची खूण पटवून देतात. मग तोंडातून आपसूक शब्द बाहेर पडल्याखेरीज राहत नाहीत...
'गझल म्हणाली मला 'चंदना'
तुझ्यात आहे निवास माझा'
तायडे, तुझा प्रत्येक शेर खूप अप्रतिम असतो. मानाचा मुजरा! शब्दांची विशेष निवड गझलियतची उंची वाढविणारी असते. समज किती आणि कशी असावी याची कार्यशाळा म्हणजे तुझी गझल! मी कायम तुला वाचतो आणि अभ्यासतो ही! माझ्यासाठी ती एक कार्याशाळाच असते. तुझ्या भावी गझल लेखनास सदिच्छा!
------------------------------
-- सुरेश नागले. नवी-मुंबई
दि. २५ डिसें. २०२४
-------------------------------------------------------------------------
काय बोलू... दादा 😊 निशब्द झाले मी ... एका अभ्यासकांनी दिलेला अभिप्राय हा कायम मौल्यवान ठरतो... खूप खूप धन्यवाद या शब्दमोतींसाठी 🙏🏻
