मराठी गझल - जाणता अजाणता

गझल - जाणता अजाणता

रात्र चालली निघून जाणता अजाणता 

चंद्र जागतो अजून जाणता अजाणता 

लाजली कळी अबोल धुंद जाहल्यावरी 

सांज थांबली भिजून जाणता अजाणता 

रंग ओततो वरूण, लाजली वसुंधरा 

वीज हासली वरून जाणता अजाणता 

हासणे तुझे तसेच भासते असे जसे 

आज पावसात ऊन जाणता अजाणता 

लागता निशा ढळू, उजाडल्या दिशा दिशा

दीप चालला विझून जाणता अजाणता 

तोच एक प्रश्न का सतावतो पुन्हा मला 

का कसा कधी कुठून जाणता अजाणता 

वेड लावते गझल अशी मला पुन्हा पुन्हा 

तीच भेटते हसून जाणता अजाणता 

चंदना सोमाणी ©®

मराठी गझल - तरी जन्म हासला

गझल - तरी जन्म हासला

 

किती डंख सोसले किती जीव त्रासला

किती खंत जाहली तरी जन्म हासला 

तुझी सावलीच ती तरी भेद हा कसा 

असे पौर्णिमा जरी नभी चंद्र ग्रासला

नको श्रावणा तुझी इथे कोरडी हवा 

बरसल्याविनाच तो पयोधर प्रवासला 

असे चंद्रमा जरी तुझ्या अंतरातला 

खरा आरसाच तो समाजास भासला 

जरी श्वास थांबला कुणी ना विचारले 

तरी चंदनापरी उभा जन्म घासला 

चंदना सोमाणी ©®

मराठी गझल - जिंदगी

गझल - जिंदगी 

सोसवेना भार आहे जिंदगी

टांगती तलवार आहे जिंदगी 

सोबतीला चांदणे आहे तरी 

पेटता अंगार आहे जिंदगी 

कोंडमारा होत आहे हा किती 

वादळी अंधार आहे जिंदगी 

राहिले नात्यास नाही मोल ही

भावना बाजार आहे जिंदगी 

यातनाही साहते नात्यातली 

हा कसा संसार आहे जिंदगी 

जीवनाला बनवतो चवदार हा

लोणच्याचा खार आहे जिंदगी 

कैकदा वाटे मला ही तर हवी

कैकदा बेजार आहे जिंदगी 

सार हा घे जीवनाचा चंदना 

बघ कशी साकार आहे जिंदगी 

अंतरिक्षा घालते ही गवसणी 

देहधारी घार आहे जिंदगी 

कोरते मृत्यू कपाळी शेवटी 

थांबते अनुस्वार आहे जिंदगी 

चंदना सोमाणी ©®

मी पाठवलेले पत्र...

मी पाठवलेले पत्र...

मी पाठवलेले पत्र....

.............................

.............................

अरे देवा हे काय केले मी 

तुला लिहायला घेतले पत्र 

अन् कोरेच पाठवून दिले न लिहिताच जीवनाचे सुत्र

माहीत होते तुला मी त्यात काय लिहिणार  

म्हणून तर जाणून बुजून केले मी हे 

भावना समजायला लागते मन

जे आहे तुझ्या कडे 

सारे कसे समजवावे मी तुला गडे 

मौनाचा अर्थ असतो गहरा

समजेल ज्याला तोच जोहरी पारखणारा

काही हिरे, माणके, पाचू अशा रत्नांनी लगडलेली मने 

का लावावी मग उगाच कोणाला दुषणे 

कोर्‍याच पानावर मी पाठवलेय मन

घे ना तू समजून, माझ्या मनातील मौन 

कारण शब्दांच्या बाबतीत मी आहे अजाण अजून

लागलाच एखादा शब्द माझा जिव्हारी 

तर तुला गमवायची नाही माझ्या मनाची तयारी

म्हणून तर पत्र मी कोरेच पाठवले 

तुझे माझे एकच मन 

इतकेच संदर्भ यातून उलगडले

चंदना सोमाणी ©®

 

मराठी गझल - जर तुझा तर...

गझल - जर तुझा तर 

बोलका होता सहारा जर तुझा तर...

भास ना आभास सारा जर तुझा तर...

अन् कशी माझ्या मनाला सावरू मी 

आतही सारा पसारा जर तुझा तर...

मी कशी जाऊ समोरी आरशाला 

पारखा झाला इशारा जर तुझा तर...

टाळताही येत नाही मग छबी ती

भोवती दाटे नजारा जर तुझा तर...

मौन मी ठेवू कसे तू सांग आता 

वेढतो आहे पुकारा जर तुझा तर...

बोल तू लावू नको मग कोणताही 

घेत नाही मी इजारा जर तुझा तर...

सोड ना सारे बहाणे टाळण्याचे 

शब्दही देई चुकारा जर तुझा तर...

चंदना सोमाणी ©®