मराठी गझल - कुणास ठावुक

गझल - कुणास ठावुक 

काय कसे अन् कुणास ठावुक

माझे माझ्या मनास ठावुक 

आभाळाला दुःख कशाचे 

कोसळणाऱ्या ढगास ठावुक

वरवरचे ते रूप साजिरे 

खरे काय ते क्षणास ठावुक

अल्प आयुचे दुःख किती ते

पर्ण फुलांच्या दलास ठावुक 

दंश जाहला सर्वांगाला 

दाहकता त्या फुलास ठावुक

फक्त दिखावा नम्रपणाचा

किती मीपणा स्वतःस ठावुक 

सावलीसही किती मोल, जे 

उन्हाळलेल्या जिवास ठावुक 

म्हणतो आपण स्वर्गच गाठू 

खरे की खोटे सुतास ठावुक 

चंदना सोमाणी ©®

मराठी गझल - करू नये ते...

गझल - करू नये ते...

करू नये ते करते आहे 

आकाशाला धरते आहे 

निळा रंगही उडून गेला

पावित्र्याला वरते आहे 

उदास झाल्या सांजसावल्या 

त्यांना सोबत करते आहे 

सावळबाधा नभास झाली 

काजळ ओले झरते आहे 

सोबतीस हे अगणित तारे 

कुणास एका स्मरते आहे 

दिखाव्यासही भुलता भुलता 

व्यर्थ वेदना मरते आहे 

कुस पालटून काळोखाची 

काळरात्रही सरते आहे 

दिशा शोधते उत्तर कोठे?

प्रश्न होउनी उरते आहे 

तडजोडी ह्या उगाच नव्हत्या 

अखेर जगणे हरते आहे 

चंदना सोमाणी ©®