गझल - कुणास ठावुक
काय कसे अन् कुणास ठावुक
माझे माझ्या मनास ठावुक
आभाळाला दुःख कशाचे
कोसळणाऱ्या ढगास ठावुक
वरवरचे ते रूप साजिरे
खरे काय ते क्षणास ठावुक
अल्प आयुचे दुःख किती ते
पर्ण फुलांच्या दलास ठावुक
दंश जाहला सर्वांगाला
दाहकता त्या फुलास ठावुक
फक्त दिखावा नम्रपणाचा
किती मीपणा स्वतःस ठावुक
सावलीसही किती मोल, जे
उन्हाळलेल्या जिवास ठावुक
म्हणतो आपण स्वर्गच गाठू
खरे की खोटे सुतास ठावुक
चंदना सोमाणी ©®
No comments:
Post a Comment