गझल - करू नये ते...
करू नये ते करते आहे
आकाशाला धरते आहे
निळा रंगही उडून गेला
पावित्र्याला वरते आहे
उदास झाल्या सांजसावल्या
त्यांना सोबत करते आहे
सावळबाधा नभास झाली
काजळ ओले झरते आहे
सोबतीस हे अगणित तारे
कुणास एका स्मरते आहे
दिखाव्यासही भुलता भुलता
व्यर्थ वेदना मरते आहे
कुस पालटून काळोखाची
काळरात्रही सरते आहे
दिशा शोधते उत्तर कोठे?
प्रश्न होउनी उरते आहे
तडजोडी ह्या उगाच नव्हत्या
अखेर जगणे हरते आहे
चंदना सोमाणी ©®
No comments:
Post a Comment