गझल - तुझी आठवण
उदास होता सोबत करते तुझी आठवण
रंग ऋतूंचा लेवुन सजते तुझी आठवण
क्षणाक्षणाला फुलते जीवन असे वाटता
त्याच क्षणांवर उदार असते तुझी आठवण
मनास माझ्या ठेच लागुनी मी कोसळता
सावरणारी आई बनते तुझी आठवण
रंगबिरंगी फुलांप्रमाणे मी दरवळता
सुमनपाखरू बनून परते तुझी आठवण
लक्ष्मणरेषा जरी आखली स्वतःभोवती
हळव्या क्षणास तरी लांघते तुझी आठवण
श्रावणातल्या सरीत भिजता वसुंधरा ती
हिरवा शेला मग पांघरते तुझी आठवण
तुझी करवती किनार सलते जरी केतकी
तरी हवीशी मला वाटते तुझी आठवण
चंदना सोमाणी ©®
No comments:
Post a Comment