गझल - चांदणे उतरून आले
चांदणे उतरून आले आज माझ्या अंगणी
भरजरी उजळून आली या धरेची पैठणी
हासणारी पाहिली की अंबरी ताराफुले
वाटते केली कुणी ही साखरेची पेरणी
चंद्र कृष्णासारखा अन् भोवताली गौळणी
रासलीला खेळणाऱ्या चांदण्या साऱ्याजणी
भोवती गंधाळती जाई जुई अन् मोगरी
गंध नाही पण तरी तोऱ्यात बहरे टणटणी
जीवघेणा मी तमाशा सोसला या जीवनी
पण तरी झंकारते रक्तात माझ्या लावणी
चंदना सोमाणी ©®
No comments:
Post a Comment