गझल - हेच वाटले होते

गझल - हेच वाटले होते 

हरता हरता जिंकू आपण हेच वाटले होते
सुटला नव्हता पेच तरी पण हेच वाटले होते

किती काहिली, तगमग होती तुला भेटण्याआधी
रुसला होता लहरी श्रावण हेच वाटले होते

शुल्लक होते कारण उगीच भांडत होते दोघे
पेटत गेला वाद अकारण हेच वाटले होते

विसरत नसतो जरी छवी तो, तरी विसरला अंती
जुन्या रूपाला नवीन दर्पण हेच वाटले होते

छळले नव्हते इतके त्याने छळले आहे आता
छळण्यालाही असेल कारण हेच वाटले होते

याच्या आधी तूच दिलेला घाव कोवळा होता
म्हणून साधा नसेल तो व्रण हेच वाटले होते

चंदना सोमाणी ©®