गझल - वाटतो आता नकोसा
सावलीचा भार सुद्धा वाटतो आता नकोसा
हा फुलांचा हार सुद्धा वाटतो आता नकोसा
का जिवाला घोर लावी चांदणेही सांजवेळी
लाघवी शृंगार सुद्धा वाटतो आता नकोसा
ओळखीची माणसेही वागती खिल्जीप्रमाणे
पद्मिनी जोहर सुद्धा वाटतो आता नकोसा
आळवेना रागदारी खेळ सारा प्राक्तनाचा
नेटका संसार सुद्धा वाटतो आता नकोसा
कोवळीशी आस माझी कोवळा संसार माझा
आर्जवी आधार सुद्धा वाटतो आता नकोसा
मोकळा जर श्वास नाही कोरडा पान्हा कशाला
बेगडी उपकार सुद्धा वाटतो आता नकोसा
दुश्मनाला लाज वाटे हादरे ही भिंत जेव्हा
नाटकी शेजार सुद्धा वाटतो आता नकोसा
चंदना सोमाणी ©®
No comments:
Post a Comment