गझल - फारसे
करतात घाव तेही दमदार फारसे
समजू नको फुलांना अलवार फारसे
आले कसे कळेना भरघोस पीक हे
नव्हते तसे बियाणे कसदार फारसे
हा रंगमंच फिरतो ज्याच्या सभोवती
कळले तरी न त्यांचे किरदार फारसे
विसरू कसे स्वतःचे ते घाव चंदनी
स्मरतात दाह त्यांचे अनिवार फारसे
चलनात आज शिक्के खोटे जिथे तिथे
शोधून सापडेना कलदार फारसे
का टाकतोस फासे उलटेच जीवना
कळलेच ना तुझे हे व्यवहार फारसे
शमली न वंचितांची पुरती तहानही
पाणी नसे तळ्याचे चवदार फारसे
मृत्यू समीप येता तेव्हा कुठे कळे
श्वासांवरी असे ना अधिकार फारसे
चंदना सोमाणी ©®
No comments:
Post a Comment