मराठी गझल - तुझी आठवण

गझल - तुझी आठवण 

उदास होता सोबत करते तुझी आठवण 

रंग ऋतूंचा लेवुन सजते तुझी आठवण

क्षणाक्षणाला फुलते जीवन असे वाटता

त्याच क्षणांवर उदार असते तुझी आठवण 

मनास माझ्या ठेच लागुनी मी कोसळता 

सावरणारी आई बनते तुझी आठवण 

रंगबिरंगी फुलांप्रमाणे मी दरवळता 

सुमनपाखरू बनून परते तुझी आठवण 

लक्ष्मणरेषा जरी आखली स्वतःभोवती 

हळव्या क्षणास तरी लांघते तुझी आठवण

श्रावणातल्या सरीत भिजता वसुंधरा ती 

हिरवा शेला मग पांघरते तुझी आठवण 

तुझी करवती किनार सलते जरी केतकी

तरी हवीशी मला वाटते तुझी आठवण 

चंदना सोमाणी ©®

मराठी गझल - चांदणे उतरून आले

गझल - चांदणे उतरून आले 

चांदणे उतरून आले आज माझ्या अंगणी 

भरजरी उजळून आली या धरेची पैठणी

हासणारी पाहिली की अंबरी ताराफुले 

वाटते केली कुणी ही साखरेची पेरणी 

चंद्र कृष्णासारखा अन् भोवताली गौळणी 

रासलीला खेळणाऱ्या चांदण्या साऱ्याजणी 

भोवती गंधाळती जाई जुई अन् मोगरी 

गंध नाही पण तरी तोऱ्यात बहरे टणटणी 

जीवघेणा मी तमाशा सोसला या जीवनी 

पण तरी झंकारते रक्तात माझ्या लावणी 

चंदना सोमाणी ©®

मराठी गझल - गुंता

गझल - गुंता

नुसता नुसता होतो गुंता 

सोडत बसतो जो तो गुंता 

आयुष्याचे होता जाळे 

वाढत जातो तो तो गुंता 

नात्यांमध्ये केला कोणी 

गुंता गुंता हो... तो गुंता 

चंदना सोमाणी ©®