मराठी गझल - हो ना..?

गझल - हो ना..?

आतल्या कोलाहला तू शांत होना

पाहिजे आहे तुला एकांत.. हो ना ?

मेणबत्ती आणि रस्ता.. ह्याच गोष्टी 

वासनेला अंत ना सीमांत.. हो ना ?

घर जळाले तर जळू दे.. काय जाते 

फक्त आपण वाचतो वृत्तांत..हो ना ?

ढग जमा झालेच आहे जर मनावर

हाच अश्रूंचा खरा सिध्दांत.. हो ना ?

प्रेम करतो आणि म्हणतो प्रेम नाही

बोलतो खोटे किती धादांत.. हो ना ?

वाळवंटातून जातो मार्ग माझा

हा तसा नाही फुलांचा प्रांत..हो ना ?

जर सुखांचा पाहिजे गोतावळा तर

दांभिकांचा अंत कर कृतांत होना

चंदना सोमाणी ©®