गझल - डोळ्यात आसवांच्या
डोळ्यात आसवांचा हा कोणता पहारा
रोमांचितो ऋतू अन् अंगावरी शहारा
बरसून घे अरे तू प्रेमात आज माझ्या
चाहूल पावसाची की हा तुझा इशारा
भुलले अशी कशी मी त्या लाघवी स्मिताला
दुरस्थ तारकांचा मज वाटला सहारा
गुलमोहरेल बघ तू सोसून झळ उन्हाची
आता तुझ्या विना मी शोधू कुठे निवारा
बघ मंद मंद वाहे आता उनाड वारा
क्षण हाय आज माझे उडती कसे भरारा
छळतोय आज वारा हळव्या क्षणास कैसा
स्वप्नात भावनांचा होतोय कोंडमारा
चंदना सोमाणी ©®
No comments:
Post a Comment