गझल - पुन्हा पावसाळा
तुझ्या आठवांचा पुन्हा पावसाळा
टपोऱ्या दवांचा पुन्हा पावसाळा
ऋतू हा फुलांचा फुलारून येता
सुगंधी क्षणांचा पुन्हा पावसाळा
बरसतात धारा कशा वाळवंटी
दिलासा जिवांचा पुन्हा पावसाळा
लपंडाव खेळे उगा आज श्रावण
उन्हासावल्यांचा पुन्हा पावसाळा
उडे पंख लेऊन क्षण हे भरारा
थवा पाखरांचा पुन्हा पावसाळा
हवासा हवासा मला वाटणारा
कवडसा मनांचा पुन्हा पावसाळा
लुटावे किती क्षण असे पावसाळी
असा आठवांचा पुन्हा पावसाळा
चंदना सोमाणी ©®
No comments:
Post a Comment