गझल - शेवटी तोही अचानक
जीव घेतो क्षण स्वतःचा शेवटी तोही अचानक
निखळतो तारा मनाचा शेवटी तोही अचानक
जन्मल्यापासून आहे मी कवडसा जर उन्हाचा
शोध घेऊ मग कुणाचा शेवटी तोही अचानक
प्रश्न हा उरलाच शेवट चार भिंती अन् घराचा
वाटला ना हाच साचा शेवटी तोही अचानक
मी जरा तडजोड केली सांजवेळी सावलीशी
तोल गेला का उन्हाचा शेवटी तोही अचानक
वाट ही माझी अडवली अन् मला अंदाज आला
चेहरा दिसला जगाचा शेवटी तोही अचानक
कोणता हा खेळ आहे खेळतो जो जीवना तू
त्रास होतो माणसाचा शेवटी तोही अचानक
दोष का हा पावलाला तोल जातो जर मनाचा
हाच कावा प्राक्तनाचा शेवटी तोही अचानक
चंदना सोमाणी ©®
No comments:
Post a Comment