गझल - कुठून आणू
हळूच श्रावण निघून गेला ॠतू नवाबी कुठून आणू
नसेल जर का फुले गुलाबी धरा गुलाबी कुठून आणू
तुझा अबोला, तुझा दुरावा... तुझ्यातले गुंतणे असेही
तुझ्या विना मी तुझ्या मिठीची नशा शराबी कुठून आणू
फुलून आल्या अबोल जखमा, उदास झाली फुले जुईची
मलाच मी भेटण्यास आता नवीन बाबी कुठून आणू
खुल्या नभाचे खुले इशारे खुणावती का क्षणाक्षणाला
कळूनही अक्षरे कळेना लिपी किताबी कुठून आणू
जिथे उन्हाळा रुसून गेला पळस तिथे मग कसा फुलावा
तुला मला जो हवाहवासा विरह रुबाबी कुठून आणू
चंदना सोमाणी ©®
No comments:
Post a Comment