मराठी गझल - तुझ्यामाझ्यातले अंतर...जरा मिटवून घेऊ चल तुझ्यामाझ्यातले अंतर
जरा समजून घेऊ चल तुझ्यामाझ्यातले अंतर
मला तू भेटतो तेव्हा, दिलासा देत जातो तू
जरा चकवून घेऊ चल तुझ्यामाझ्यातले अंतर
कुणाला वाटु दे इर्षा, कुणाला वाटु दे हेवा
जरा उजळून घेऊ चल तुझ्यामाझ्यातले अंतर
नको नुसतेच लावू तू मधाचे बोट ओठांना
जरा उमजून घेऊ चल तुझ्यामाझ्यातले अंतर
नभाला हाक देऊ चल, उन्हाला साथ देऊ चल
जरा वळवून घेऊ चल तुझ्यामाझ्यातले अंतर
नभाने झाकले आहे तुला काही मला काही
जरा हरवून घेऊ चल तुझ्यामाझ्यातले अंतर
किती तू लांब गेला बघ, पुन्हा परतून येतो का ?
जरा मिळवून घेऊ चल तुझ्यामाझ्यातले अंतर
चंदना सोमाणी ©®
No comments:
Post a Comment