सर्व्हर डाऊन...

                        संपादक - संतोष थोरहाते  

सर्व्हर डाउन....

टीव्हीवर सर्व्हर डाऊन बातमी वाचली आणि दुनिया अचानक थांबल्याचा भास झाला... माझ्यापुरता तरी. 

पहिल्यांदा विचार आला तो स्वातीचा, तिचे विश्वच फेसबुक आणि व्हाट्सअप भवती... तिची फिरकी घ्यावी म्हणून तिचा नंबर डायल केला तर बाईसाहेब पार्टी एन्जॉय करत होत्या. या गोष्टीचा त्यांना पत्ताच नव्हता. " काय बोलतेस काय? अरे माझ्या फेसबुक पोस्ट, माझ्या कविता, माझे फोटोज्..." अरे स्वाती तू ते काय घेऊन बसलीस सूत्रांकडून तर मला असे समजले आहे की, उद्यापासून आपले सर्व फोन कॉल्स पण बंद...

तिचा माझ्यावर विश्वास न बसल्याने तिने नेट ऑन करून पाहिला "नेट तर सुरूच आहे" थांब म्हणता म्हणताच...

फोन कट. कावळा बसायला आणि फांदी तुटायला एक झाले की काय, असा विचार करत मी देखील किमान दहा वेळा तरी फोन ऑन-ऑफ करून पाहिला. तिही तेच करत असेल बहुदा..

तिकडे जाऊबाई हातावर फोन आपटून आपटून पाहत असल्याचे पाहून पन्नास हजाराचा मोबाईल रिमोट सारखा हातावर काय आपटून आपटून पाहतेस म्हणत तिलाच आता आपटायचे बाकी ठेवले होते भाऊजींनी. तुम्हीसुद्धा सर्व्हर डाऊन असल्याकारणानेच मोबाईल मधून डोकं वर काढून तिच्याकडे पाहिले, त्यांचा राग पाहता सांगणार कोण ?

 मुलांच्या मोबाईलने घरातील कोपरान् कोपरा पालथा घातला. या समाज माध्यमांनी आपल्या मनावर एवढे गारुड घातले आहे की, त्यांनी आपल्या आनंदाचा सर्व्हर डाऊन केला काही काळापुरता...

हे पुन्हा सुरू होईल की नाही, मी देखील मुलांना चार-चार वेळा जाऊन विचारले. तुझे काय मम्मा! मुलांनी ऐकल्या न ऐकल्यासारखं केले, फारच फोन ॲडिक्ट झालीस असं अहो पण म्हणाले...

नाही, बरोबर आहे... "पण तुम्हाला कसे कळणार घरात एकटे असताना हे फेसबुक, व्हाट्सअप, फोन कॉल्स हेच आमच्या करमणुकीचे साधन, आणि जनसंपर्क सुद्धा... तुम्ही बाहेर पडल्यावर चार लोकांना भेटता, जितका वेळ बाहेर असता कामानिमित्त का असेना पण संवाद असतोच ना, जनसंपर्क येतोच ना... पण; आम्हाला मात्र किती बोलतेस  फोनवर असे बोलून रिकामे.  विरंगुळ्यासाठी, काही वाचनासाठी ऑनलाइन असलो की विचारणारे भरपूर... आमच्या आनंदाचा सर्व्हर डाऊन झाला तरी चालेल पण; तुमचा नको. रहा ना काही दिवस घरात ...

नेटवर्कसाठी कोपरान् कोपरा धुंडाळणारी मुले, रागावलेले भाऊजी, आमचे अहो हे ऐकताच जवळ आले आणि सर्व्हर डाऊन असो वा नसो यापुढे रविवार सोबतच रात्री दहा ते अकरा ही वेळ कायम घरातल्यांसाठीच असणार असे म्हणताच मोबाईलने सर्व्हर पकडो न  पकडो पण आनंदाने मात्र पुन्हा सर्व्हर पकडला...

चंदना सोमाणी पुणे 

🌹🌹🌹🌹🌹🌹🌹🌹🌹🌹🌹🌹🌹🌹🌹